काठमाडौं, राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनसहित तीन सांसदलाई प्रहरीले सिंहदरबार परिसरबाट नियन्त्रणमा लिएको छ।
चैत १५ गते तीनकुनेमा भएको विरोध प्रदर्शनमा पक्राउ परेका आफ्ना नेता तथा कार्यकर्ताको रिहाइको माग गर्दै प्रदर्शनमा उत्रिएका लिङ्देन र अन्य नेताहरूलाई प्रहरीले सिंहदरबारभित्रैबाट पक्राउ गरेको हो।
सिंहदरबारस्थित राप्रपाको संसदीय दलको कार्यालयमा रहेका प्रमुख सचेतक ज्ञानेन्द्र शाही, सांसद दीपक सिंह र बिना लामालाई भेट्न पुगेका अध्यक्ष लिङ्देनलाई प्रहरीले नियन्त्रणमा लिएको हो।
प्रहरीले उपाध्यक्ष बुद्धिमान तामाङ र प्रमुख सचेतक ज्ञानेन्द्र शाहीलाई पनि पक्राउ गरेको छ। संसदीय दलको कार्यालयमा थुनिएका शाहीसहितका नेताहरूसँग भेटेपछि अध्यक्ष लिङ्देनले त्यहीँबाट विरोध सुरु गरेका थिए।
कार्यालयबाट केही सांसदसहित बाहिर निस्केको लिङ्देन नेतृत्वको टोलीले सिंहदरबारभित्रै पर्चा देखाउँदै प्रदर्शन गरेको थियो। उनीहरूलाई नयाँबानेश्वरको निषेधित क्षेत्रतर्फ जान नदिई प्रहरीले नियन्त्रणमा लिएको बताइएको छ।