बुटवल ।
भारतको जम्मु कश्मीरमा आतंकवादी आक्रमणमा मारिएका २७ वर्षीय सुदीप न्यौपानेको शव नेपाल ल्याइएको छ।
मंगलबार दिउँसो कश्मीरको वैसरण उपत्यकामा घुम्ने क्रममा बन्दुकधारी आतंकवादीको गोलीबाट सुदीपको मृत्यु भएको थियो। उनी आमा रिमाकला, बहिनी सुष्मा र ज्वाइँ युवराज काफ्लेसँग घुम्न गएका थिए। आमा, बहिनी र ज्वाइँले भागेर ज्यान जोगाएका थिए भने रिमाकला सामान्य घाइते भएकी छन्।
शव नयाँ दिल्ली–लखनउ हवाईमार्ग हुँदै, बेलहिया नाका हुँदै बुटवल ल्याइएको हो। प्रहरी उपरीक्षक रञ्जितसिंह राठौरका अनुसार शव बिहीबार बिहान बेलहिया आइपुगेको हो। शवसँगै परिवारका सदस्यहरू पनि फर्किएका छन्।
कम्तीमा २६ जनाको ज्यान गएको सो आतंकवादी घटनामा दुई विदेशी नागरिक पनि मारिएका छन्। सुदीप बुटवल–११ कालीकानगरमा आमा र बहिनीसँग बस्दै आएका थिए। उनका बुबा शिक्षक ध्रुव न्यौपाने काठमाडौंमा आन्दोलनमा सहभागी भइरहेका बेला छोराको निधनको खबर पाएका थिए।