काठमाडौँ,जेठ २१ ।
शैक्षिक भ्रमण पोखराबाट काठमाडौँ फर्किरहेका विद्यार्थी सवार बसमाथि मध्यरातमा ढुंगामुढा भएको छ। उक्त आक्रमणमा परी पाँच विद्यार्थी घाइते भएका छन्। घटनामा संलग्न भएको आरोपमा प्रहरीले बसका एक चालक, एक सहचालक र एक ग्यारेजमा काम गर्ने व्यक्ति गरी तीन जनालाई पक्राउ गरी सार्वजनिक गरेको छ।
जिल्ला प्रहरी कार्यालय, कास्कीका अनुसार जेठ १८ गते राति करिब साढे ११ बजे पोखरा महानगरपालिकास्थित चाउथेमा बा १ प ९१६ नम्बरको बसमाथि ढुंगा प्रहार भएको थियो। उक्त बस ललितपुरको बालकुमारीस्थित नेपाल कलेज अफ इन्फरमेसन टेक्नोलोजीका विद्यार्थीहरूलाई लिएर शैक्षिक भ्रमण सकेर काठमाडौंतर्फ जाँदै थियो।
प्रहरीले आक्रमणमा संलग्न भएको आरोपमा चितवन घर भई बस चालकको ४८ वर्षीय तिलकबहादुर थापा मगर, बारा घर भई बसमा सहचालकको काम गर्ने ३० वर्षीय मानप्रसाद खरेल र गोरखाको पालुङटार घर भई ग्यारेजमा काम गर्ने २८ वर्षीय राजेश मरहट्टालाई पक्राउ गरेको हो। उनीहरूलाई इलाका प्रहरी कार्यालय शिशुवा र वडा प्रहरी कार्यालय रामबजारबाट खटिएको संयुक्त प्रहरी टोलीले पक्राउ गरेको जनाइएको छ।
घाइते विद्यार्थीहरूको अवस्था सामान्य रहेको र उनीहरूको स्थानीय स्वास्थ्य संस्थामा उपचार गरिएको नेपाल प्रहरीले जनाएको छ। पक्राउ परेका तीनैजनालाई कास्की जिल्ला अदालतबाट आपराधिक उपद्रवको कसुरमा ६ दिनको म्याद थप गरी अनुसन्धान अघि बढाइएको जिल्ला प्रहरी कार्यालय कास्कीका प्रवक्ताले जानकारी दिएका छन्। आक्रमणको कारणबारे थप अनुसन्धान भइरहेको प्रहरीले जनाएको छ।