काठमाडौँ, जेठ २७ ।
नेपाल प्रहरीको नायव उपरीक्षक (डीएसपी) हुँ भन्दै हिरासतमा रहेका व्यक्तिको मुद्दा मिलाइदिने प्रलोभन देखाएर ठगी गरेको आरोपमा प्रहरीले दुई जनालाई पक्राउ गरेको छ। पक्राउ पर्नेमध्ये एक जना यसअघि हातहतियार तथा खरखजना मुद्दामा ५ वर्ष जेल सजाय भुक्तान गरिसकेका व्यक्ति हुन्।
जिल्ला प्रहरी परिसर, काठमाडौँको टोलीले काभ्रेको चौँरी देउरालीका ४५ वर्षीय ज्ञानबहादुर लामा भन्ने ज्ञानु तामाङ र सुनसरीको इटहरी-५ का ४२ वर्षीय रेवती ओझालाई पक्राउ गरेको हो।
प्रहरीका अनुसार, उनीहरूले हिरासतमा रहेका एक व्यक्तिको मुद्दा मिलाइदिने भन्दै पीडित पक्षबाट ६ लाख रुपैयाँ ठगी गरेका थिए। पीडितको उजुरीका आधारमा खटिएको प्रहरी टोलीले उनीहरूलाई पक्राउ गर्न सफल भएको हो।
पक्राउ परेका दुवै जनालाई ठगी कसुरमा काठमाडौं जिल्ला अदालतबाट ५ दिनको म्याद थप गरी अनुसन्धान अगाडि बढाइएको जिल्ला प्रहरी परिसरले जनाएको छ।
अनुसन्धानका क्रममा पक्राउ परेका ज्ञानु तामाङ २०७० फागुन २० गते हातहतियार तथा खरखजना मुद्दामा ५ वर्ष कैद भुक्तान गरेर छुटेको खुलेको छ।