काठमाडौँ।
सरकार र यातायात व्यवसायीबीच सोमबार भएको वार्ता निष्कर्षविहीन भएपछि मंगलबार (भोलि)पनि देशभर सार्वजनिक यातायात नचल्ने भएको छ।
गृह मन्त्रालयमा भएको वार्ताले समाधान निकाल्न नसकेपछि नेपाल यातायात राष्ट्रिय व्यवसायी महासंघका अध्यक्ष विजय स्वाँरले भोलि बिहान १०:३० बजे पुनः बैठक बस्ने जानकारी दिए।
उनका अनुसार, “नियमावली स्थगित गर्नुस्, हामी आन्दोलन स्थगित गर्छौं भनेका थियौं। तर निष्कर्ष नआएकोले भोलि पनि सवारी साधन नचल्नेछ।” गण्डकी प्रदेश सरकारले ल्याएको राइड सेयरिङसम्बन्धी नियमावलीविरुद्ध व्यवसायी आन्दोलनमा उत्रिएका हुन्। उनीहरूको माग छ – नियमावली तत्काल स्थगित गरियोस् र संघीय ऐन बनेपछि मात्र कार्यान्वयनमा ल्याइयोस्।
सरकार पक्षबाट वार्ता सहभागी यातायात व्यवस्था विभागका निर्देशक नरहरि तिवारीले पनि छलफल सकारात्मक भए पनि निर्णयमा पुग्न नसकिएको जानकारी दिएका छन्।