काठमाडौँ, जेठ २३ ।
विपद् उद्धार अभ्यासका क्रममा बिहीबार सप्तकोशी नदीमा बेपत्ता भएका दुई सुरक्षाकर्मीमध्ये एक जनाको शव फेला परेको छ। अर्का एक जनाको भने खोजी कार्य जारी रहेको छ।
जिल्ला प्रहरी कार्यालय सुनसरीका प्रवक्ता, प्रहरी नायब उपरीक्षक योगराज खतिवडाले दिएको जानकारीअनुसार बेपत्ता भएका सशस्त्र प्रहरी जवान झापाका हरेदेव राजवंशीको शव केहीबेरअघि सप्तकोशी किनारमा फेला परेको हो।
बेपत्ता सुरक्षाकर्मीहरूको खोजीका लागि सशस्त्र प्रहरी बलका वरिष्ठ प्रहरी उपरीक्षक (एसएसपी) नेत्र कार्कीको नेतृत्वमा ३५ सदस्यीय विशेष टोली परिचालन गरिएको थियो। सोही टोलीले निरन्तरको प्रयासपछि राजवंशीको शव फेला पारेको हो।
उनीहरू बिहीबार सप्तकोशी नदीमा सञ्चालित संयुक्त विपद् उद्धार अभ्यासका क्रममा डुङ्गा पल्टिँदा बेपत्ता भएका थिए। हराइरहेका अर्का सशस्त्र प्रहरी जवान डोटीका सुरज साउदको भने अझै खोजी कार्यलाई तीव्रता दिइएको प्रहरीले जनाएको छ।