काठमाडौँ, जेठ २२ ।
कैलालीको घोडाघोडी नगरपालिकामा बिहीबार बिहान मोटरसाइकल दुर्घटना हुँदा एक जनाको मृत्यु भएको छ भने दुई जना घाइते भएका छन्।
भालुफटामा अनियन्त्रित मोटरसाइकल रोकिराखेको ट्र्याक्टरको ट्रलीमा ठोक्किँदा मोटरसाइकल पछाडि सवार २४ वर्षीय राधेश्याम चौधरीको मृत्यु भएको हो। चालक २१ वर्षीय शंकर चौधरी गम्भीर घाइते भएका छन् भने अर्का सवार २२ वर्षीय अर्जुन चौधरी पनि घाइते भएका छन्।
पूर्व–पश्चिम राजमार्ग अन्तर्गत घोडाघोडी नगरपालिका–१ स्थित भालुफटामा बिहान करिब सवा ४ बजे से ६ प ४४३६ नम्बरको मोटरसाइकल अनियन्त्रित भई सडकमा बिग्रिएर रोकेको सुपप्र ०१–००२ त ५१५८ नम्बरको ट्र्याक्टरको इन्जिन नभएको ट्रलीमा ठोक्किएको थियो। प्रहरीले घटनाबारे थप अनुसन्धान गरिरहेको छ।
दुर्घटनामा मोटरसाइकलको पछाडि सवार घोडाघोडी नगरपालिका–२ का २४ वर्षीय राधेश्याम चौधरी गम्भीर घाइते भए। उपचारका लागि घोडाघोडी अस्पताल लैजाँदै गर्दा उनको मृत्यु भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) राजकुमार सिंहले जानकारी दिए।
प्रहरीले घटनाबारे थप अनुसन्धान गरिरहेको जनाएको छ।