काठमाडौँ, जेठ २४ ।
रूसले युक्रेनमाथि गरेको जवाफी कारवाहीमा परी कम्तिमा ५ जनाको मृत्यु भएको छ । युक्रेनको राजधानी किएभमा गएराती गरेको आक्रमणमा परी अन्य ८० जना भन्दा बढि घाइते भएका छन् । रूसले रातभर युक्रेनमा ड्रोन आक्रमण गरेको अधिकारीहरूले बताएका छन् । किएभका नगर प्रमख भिटाली क्लिट्स्कोले राजधानीमा भएको घटनाको पुष्टि गर्दै घाइते मध्ये १६ जनालाई अस्पतालमा भर्ना गरिएको बताएका छन् ।
अन्तर्राष्ट्रिय सञ्चार माध्यमका अनुसार आक्रमणका कारण आवासीय भवन, पूर्वाधारलगायत संरचना क्षतिग्रस्त भएका छन् भने ठाउँठाउँमा आगलागी भएको छ । युक्रेनको राष्ट्रिय रेलवे सञ्चालकले रेल सेवा ढिलाइ हुने चेतावनी दिँदै आक्रमणले किएभ क्षेत्रमा रेल मार्गहरू क्षतिग्रस्त भएको उल्लेख गरेको छ ।
पश्चिमी युक्रेनको लुत्स्क शहर र टेर्नोपिल क्षेत्रमा पनि थुप्रै आक्रमणहरू भएका छन् । धेरै निजी घरहरू र शैक्षिक संस्थाहरू क्षतिग्रस्त भएको सहरका नगरप्रमुख इगोर पोलिस्चुकले टेलिग्राम मार्फत जानकारी गराएका छन् ।