काठमाडौँ, जेठ २७ ।
सशस्त्र प्रहरी बल नेपालले पर्साका विभिन्न स्थानबाट भन्सार छलेर अवैध रूपमा भित्र्याइएका १३ लाख ७१ हजार रुपैयाँ बराबरका सामान बरामद गरेको छ। सशस्त्र प्रहरीको पर्सास्थित इकाइले चोरीपैठारी नियन्त्रण अभियानअन्तर्गत उक्त परिमाणको सामान बरामद गरेको हो।
सशस्त्र प्रहरी बल पर्साका अनुसार, सबैभन्दा ठूलो परिमाणमा वीरगञ्ज महानगरपालिका–१० स्थित एक गोदामबाट सामान बरामद गरिएको छ। धीरज रौनियारले भारतबाट अवैध रूपमा भन्सार छली गरी ल्याएर गोदाममा भण्डारण गरेको अवस्थामा सात लाख ७० हजार ५०० मूल्य बराबरको कपडा बरामद गरिएको हो।
सोही क्रममा प्रहरीले करिब एक लाख ५० हजार मूल्य पर्ने बीआर ०५ यु ४५३० नम्बरको भारतीय सुपर स्प्लेन्डर मोटरसाइकल पनि नियन्त्रणमा लिएको छ। बरामद गरिएका कपडा र मोटरसाइकल आवश्यक कारबाहीका लागि वीरगञ्ज भन्सार कार्यालयमा बुझाइएको छ।
यसैगरी, सशस्त्र प्रहरीले वीरगञ्ज महानगरपालिकाकै वडा नं. १० तथा १६ का विभिन्न सीमानाकाबाट दुई लाख ४८ हजार १०१ रुपैयाँ बराबरको अवैध कपडा तथा मसला पनि बरामद गरेको सशस्त्र प्रहरीले जनाएको छ।