काठमाडौँ, जेठ २७ ।
धनगढी उपमहानगरपालिकामा लागुऔषध (खैरो हेरोइन) सहित नेपाल प्रहरीका एक जवान पक्राउ परेका छन्। सुदूरपश्चिम प्रदेश प्रहरी कार्यालय, धनगढीमा कार्यरत प्रहरी जवान चिरञ्जीवी विश्वकर्मालाई लागुऔषधसहित मंगलबार पक्राउ गरिएको हो।
लागुऔषध नियन्त्रण ब्युरोको धनगढीस्थित शाखा कार्यालय र वडा प्रहरी कार्यालयको संयुक्त टोलीले उनलाई धनगढी उपमहानगरपालिका–२ स्थित प्रदेश प्रहरी कार्यालय बाहिरको सडकबाट पक्राउ गरेको हो। उनको साथबाट ३८० मिलिग्राम खैरो हेरोइन बरामद भएको प्रहरीले जनाएको छ।
गोदावरी नगरपालिका, कैलाली-९ का स्थायी बासिन्दा रहेका विश्वकर्मा आफ्नै कार्यरत कार्यालयको गेट बाहिरबाट लागुऔषधसहित पक्राउ परेका हुन्। सुरक्षा दिने जिम्मेवारी बोकेको प्रहरी नै लागुऔषध कारोबारमा संलग्न भएको घटनाले गम्भीर प्रश्न खडा गरेको छ।
पक्राउ परेका विश्वकर्मामाथि थप अनुसन्धान भइरहेको जिल्ला प्रहरी कार्यालयले जनाएको छ।